Rape complaint of Bapunagar girl against Dayapar police officer | દયાપરના પોલીસ કર્મચારી સામે બાપુનગરની યુવતીની દુષ્કર્મની ફરિયાદ

અમદાવાદના બાપુનગર વિસ્તારમાં રહેતી 25 વર્ષીય યુવતીએ મૂળ અમદાવાદના અને હાલમાં દયાપર પોલીસ સ્ટેશનમાં ફરજ બજાવતા પોલીસ કર્મચારી વિરુદ્ધ લગ્નની લાલચ આપીને બળાત્કાર ગુજાર્યાની ફરિયાદ નોંધાવી છે.

મૂળ સૌરાષ્ટ્રની યુવતીની 2016માં લગ્ન પ્રસંગમાં ગોમતીપુર વિસ્તારમાં રહેતા પોલીસ કોન્સ્ટેબલ મહેન્દ્ર ચાવડા સાથે મુલાકાત થઈ હતી.થોડાસમય બાદ મહેન્દ્રએ યુવતીને પ્રેમનો પ્રસ્તાવ મુક્યો હતો. જો કે તેમની વચ્ચે વાતચીતનો દોર આગળ વધતા બંને વચ્ચે પ્રેમસબંધ બંધાયો હતો. ડિસેમ્બર, 2016માં તેણે યુવતીને હોટલમાં લઈ જઈ શરીરસબંધ બાંધ્યો હતો જેના પગલે યુવતીને ગર્ભ રહી ગયો હતો. જો કે યુવતી સરકારી નોકરીની તૈયારી કરતી હોઈ તેણે મહેન્દ્રના કહેવાથી ગર્ભપાત કરાવી દીધો હતો.2020માં યુવતી સૌરાષ્ટ્રથી અમદાવાદ રહેવા આવી ત્યારબાદ તેમની વચ્ચેની મુલાકાત વધી ગઈ હતી. ત્યારે યુવતીને જાણ થઈ કે મહેન્દ્ર પરણિત છે.તે સમયે તે બાપુનગર પોલીસ સ્ટેશનમાં નોકરી કરતો હતો. યુવતીએ તેને લગ્ન કરવાનુ કહેતા મહેન્દ્રએ કહ્યુ પત્ની સાથે ઝઘડા ચાલે છે અને તે છુટાછેડા લેવાના પૈસા માગતી હોઈ છુટા થયા બાદ હું તારી સાથે લગ્ન કરીશ. ત્યારબાદ યુવતીની સાથે શરીરસબંધ બાંધવાનો સિલસિલો ચાલુ રહેતા યુવતી બીજીવખત ગર્ભવતી થતા ફરી ગર્ભ પડાવી નાંખ્યો હતો. દરમિયાન મહેન્દ્ર ચાવડાએ લગ્ન કરવાનો ઈન્કાર કરી દેતા અંતે યુવતીએ ફરિયાદ નોંધાવી છે. યુવતીએ ગર્ભ પડાવી લીધા બાદ લગ્નની જીદ કરતા મહેન્દ્ર ચાવડાએ તેની પત્ની સાથે છુટાછેડા લીધા બાદ લગ્ન કરવાનુ કહીને લીવ ઈન રિલેશનશીપનો કરાર કરાવ્યો હતો.