In Surat City Youth Congress executive, office-bearers including regional in-charges were present, will agitate with employment and inflation issues. | સુરત શહેર યુથ કોંગ્રેસની કારોબારીમાં પ્રદેશ પ્રભારી સહિતના હોદ્દેદારો હાજર રહ્યા, રોજગારી અને મોંઘવારી મુદ્દા સાથે આંદોલન કરશે

લોકસભાની ચૂંટણીમાં યુથ કોંગ્રેસ મહત્વની ભૂમિકા ભજવવા માટે તૈયાર

લોકસભાની ચૂંટણી આવી રહી છે ત્યારે કોંગ્રેસ દ્વારા સંગઠન મજબૂત કરવા માટેની કવાયત શરૂ કરી દેવામાં આવી છે. યુથ કોંગ્રેસના પ્રદેશ મહામંત્રી સુરત શહેર ખાતે આવીને કારોબારીમાં હાજરી આપી હતી. આગામી દિવસના કાર્યક્રમ અંગે વિસ્તૃત ચર્ચા કરી હતી. જેમાં રોજગારી અને મોંઘવારીના મુદ્દા સાથે આંદોલન કરશે તેવી પણ ચર્ચા કરાઇ હતી.

વધુમાં વધુ યુવાઓને જોડવાનો પ્રયાસ શરૂ કરાશે
યુથ કોંગ્રેસ દ્વારા અલગ અલગ મુદ્દાઓને લઈને વિસ્તૃત ચર્ચા કરવામાં આવી હતી. ખાસ કરીને યુથ કોંગ્રેસની કારોબારીમાં વધુ યુવાનો કોંગ્રેસ પાર્ટીમાં જોડાય તેવા પ્રયાસો શરૂ કરવા માટે હાકલ કરવામાં આવી છે. યુવાનોને દેશની સ્થિતિ અંગે માહિતગાર કરવા સરકારી યોજનાઓમાં થતા ભ્રષ્ટાચાર, ખોટી જાહેરાતો અને સરકારની ખોટી નીતિઓ યુવાઓ સુધી કેવી રીતે પહોંચાડવી તે અંગે માર્ગદર્શન આપવામાં આવ્યું હતું. નવા મતદારોનું નામ વધુમાં વધુ મતદાર યાદીમાં નોંધાઇ અને તેઓ કોંગ્રેસની વિચારધારા તરફ આગળ આવે તે માટે સંગઠનાત્મક રીતે કામ કરવા માટે યુવા કાર્યકર્તાઓને તૈયાર કરવામાં આવી રહ્યા છે.

રોજગારી અને મોંઘવારી અમારા મુખ્ય મુદ્દા
​​​​​​​સુરત શહેર યુથ કોંગ્રેસ પ્રમુખ મેહુલ દેસાઈએ જણાવ્યું કે, આજે મળેલી કારોબારીમાં અમારા પ્રદેશ યુથ કોંગ્રેસના પ્રભારી રાજેશ સિન્હા દ્વારા માર્ગદર્શન આપવામાં આવ્યું છે. સરકાર દ્વારા રોજગારીના મુદ્દે દેશના યુવાનોને ગેરમાર્ગે દોરવામાં આવી રહ્યા છે. એમણે જે કરોડો યુવાનોને રોજગારી આપવાની વાત કરી હતી તે પોકળ પૂરવાર થઈ રહી છે. યુથ કોંગ્રેસ યુવાનોની સાચી સ્થિતિ દેશમાં શું છે તે યુવાનો સુધી પહોંચાડશે. મોંઘવારીને કારણે મધ્યમ અને ગરીબ વર્ગ પીડાઈ રહ્યું છે. આગામી દિવસોમાં આ મુદ્દાઓને લઈને અમે શહેરભરમાં આશ્ચર્યજનક કાર્યક્રમો આપવાના છે અને શહેરના યુવાનો કોંગ્રેસની વિચારધારા સાથે વધુમાં વધુ જોડાઇ તે માટે અમે તમામ સ્તર ઉપર કામ કરવાના છે.