Foreign liquor worth 6.67 lakhs was seized from the new small water well | નવા થોરાળા પાણીની કૂઇ પાસેથી 6.67 લાખનો વિદેશી દારૂ પકડાયો

શહેરના નવા થોરાળા વિસ્તારમાં આવેલી પાણીની કૂઇ પાસે શેરી નં.1માં હીરા પુંજા ચૌહાણ નામના શખ્સે તેના ઘરમાં વિદેશી દારૂનો જથ્થો ઉતાર્યો હોવાની થોરાળા પોલીસને માહિતી મળી હતી. પોલીસ દરોડા સમયે હીરા ચૌહાણ તેના ઘરમાંથી મળી આવ્યો હતો. ઘરની તલાશી લેતા વિદેશી દારૂની જુદી જુદી બ્રાંડની કુલ 1212 બોટલ મળી આવી હતી. પોલીસે રૂ.6.67 લાખનો દારૂ કબજે કરી હીરાની પૂછપરછ કરતા તેની સાથે વિનોદનગર-1માં રહેતો વિજય ભીમજી પરમાર પણ હોવાની કેફિયત આપતા પોલીસે બંને સામે ગુનો નોંધ્યો છે અને વિજય પરમારને પકડવા ચક્રો ગતિમાન કર્યા છે.

દારૂનો જથ્થો ક્યાંથી લઇ આવ્યા, કોની પાસેથી લીધો તે સહિતની વિગતો બહાર લાવવા પોલીસે હીરાને રિમાન્ડ પર લેવા તજવીજ હાથ ધરી છે. અન્ય એક દરોડામાં નાનામવા રોડ, જય ભીમનગર-1માં રહેતો સિદ્ધાર્થ કિશોર જાદવ નામનો શખ્સ તેના ઘર પાસે વિદેશી દારૂનું વેચાણ કરતો હોવાની માહિતીના આધારે તાલુકા પોલીસે સિદ્ધાર્થને દારૂની 11 બોટલ અને 14 બીયરના ટીન સાથે પકડી પાડ્યો હતો. પોલીસે સિદ્ધાર્થની આકરી પૂછપરછ કરતા તેને ઘર પાસે સંતાડેલી વિદેશી દારૂની વધુ 23 બોટલ કાઢી આપી હતી. પોલીસે દારૂનો જથ્થો કબજે કરી ધરપકડ કરી છે. વિદેશી દારૂનો જથ્થો જોન નામનો શખ્સ આપી ગયાની સિદ્ધાર્થે કેફિયત આપી છે.