વડોદરાની MS યુનિ.માં ફેકલ્ટી ઓફ લોમાં અભ્યાસ કરતા વિદ્યાર્થીનો આપઘાત, આત્મહત્યાનું રહસ્ય અકબંધ | A student studying in the Faculty of Law in MS University of Vadodara committed suicide, the mystery of suicide remains intact.

વડોદરાની એમ.એસ. યુનિવર્સિટીની ફેકલ્ટી ઓફ લોમાં LLBના ત્રીજા વર્ષમાં અભ્યાસ કરતા વિદ્યાર્થીએ ફતેગંજ વિસ્તારમાં આવેલ મકાનમાં ગળેફાંસો ખાઈને આપઘાત કરી લેતા ચકચાર મચી ગઈ છે. આ ઘટનાની જાણ થતાં જ ફતેગંજ પોલીસ ઘટના સ્થળે દોડી ગઈ છે અને મૃતદેહને પોસ્ટમોર્ટમ માટે સયાજી હોસ્પિટલમાં મોકલી આપવામાં આવ્યો છે. આવતીકાલે મંગળવારે સવારે વિદ્યાર્થીનું પોસ્ટમોર્ટમ કરવામાં આવશે.

આપઘાતનું કારણ અકબંધ
મૂળ મધ્યપ્રદેશનો રહેવાસી વિદ્યાર્થી પ્રિતમ ચૌહાણ વડોદરાના ફતેગંજ વિસ્તારમાં આવેલ ગોલ્ફ વ્યુ એવન્યુમાં રહેતો હતો અને એમ.એસ.યુનિવર્સિટીની ફેકલ્ટી ઓફ લોમાં અભ્યાસ કરતો હતો. આજે રાત્રે યુવાને ગોલ્ફ વ્યુ એવન્યુ સ્થિત મકાનમાં ગળેફાંસો ખાઈને આપઘાત કરી દીધો હતો. આ ઘટનાની જાણ થતાં ફતેગંજ પોલીસ ઘટના સ્થળે દોડી ગઇ હતી. આ મામલે પોલીસે તપાસ શરૂ કરી હતી.

વિદ્યાર્થીના મિત્રો ઘટના સ્થળે દોડી આવ્યા
યુવાન પાસેથી કોઈ સુસાઇડ નોટ મળી નથી. જેથી ફતેગંજ પોલીસે યુવાનના આપઘાતનું કારણ જાણવા માટે વધુ તપાસ શરૂ કરી છે. વિદ્યાર્થી એમ.એસ. યુનિવર્સિટીમાં ભણતો હોવાથી પ્રિતમના મિત્રો ગોલ્ફ વ્યુ એવન્યુમાં દોડી આવ્યા હતા. પોલીસે આપઘાતનું કારણ જાણવા માટે તેના મિત્રોની પૂછપરછ પણ કરી હતી.

પોલીસે પરિવારને જાણ કરી
મૃતક વિદ્યાર્થી મૂળ મધ્યપ્રેધનો હોવાથી પોલીસે તેના પરિવારજનોને જાણ કરી દીધી છે. આવતીકાલે વિદ્યાર્થીનો પરિવાર વડોદરા આવશે. પોલીસે વિદ્યાર્થીના મૃતદેહને સયાજી હોસ્પિટલના કોલ્ડ રૂમમાં મોકલી આપ્યો છે. આવતીકાલે મંગળવારે સવારે પોસ્ટમોર્ટમ કરવામાં આવશે.